Mobalor sa ₱4,080,000 ang damyos human gilamoy sa dakong kalayo ang lima ka panimalay ug duha pa ang partially damaged sa sunog nga nahitabo pasado alas-3 sa hapon milabayng adlaw sa Purok 7, Barangay Bagontaas, Valencia City.
Matod ni FO1 Bryan B. Kalye, Fire Arson Investigator sa Valencia City Fire Station, sa pakighinabi sa Juander Radyo Malaybalay dali nilang girepondihan ang nasangpit nga lugar, diin dako na ang kalayo ug kusog ang pagdilaab niini sa ilang pag-abot, hinungdan giisa sa ika-tulong alarma alang sa dugang pwersa gikan sa Aglayan Substation, Maramag Fire Station, Water District, ug CDRRMO.
Gideklara usab nga fire out and insidente pila ka minutos ang milabay, hinuon walay natala nga casualty sa panghitabo.
Sa pagkakaron, padayon giimbestigahan sa mga otoridad ang tinubdan sa sunog diin giingong nagikan sa panimalay ni Dexter Villas kinsa gipahingmungtan ang pagsunog sa iyang balay human nakalalis ang asawa. Kasong arson ang atubangon sa suspetsado nga misibat human sa insidente.
via: BFP – Maramag
