Patay ang usa ka lalaki, samtang angol usab ang duha ka kaubanan niini, human ang insidente sa pagpamusil sa National Highway, Purok 10, Barangay Kibia, Matalam, Cotabato, hapon niadtong nakalabay nga adlaw.
Giila ang biktima nga si Rey Labagnao, 38-anyos, minyo, residente sa Purok 3 sa nahisgutang Barangay, samtang daling gidala sa balay tambalanan si alyas Anthony alang sa atensyong medikal. Samtang nakaangkon usab og minor injury si alyas Con.
Sa taho sa Matalam Municipal Police Station, pauli na niadtong higayona ang mga biktima sakay sa usa ka Kawasaki Bajaj nga motorsiklo gikan sa Barangay Marbel, dihang gisundan sila og usa ka Kawasaki KLX nga motorsiklo ug gipamusil.
Nakaangkon og mga samad pinusilan si Labagnao sa lain-laing parte sa iyang lawas, nga miresulta sa iyang hinanaling kamatayon. Narekober sa crime scene ang pito ka basiyo sa caliber .45 nga pistola.
Sa karon, padayon pa ang ginahimong imbestigasyon sa otoridad, aron masuta ang motibo sa pagpamusil lakip na ang posibleng pag-ila sa suspetsado.
Photo Courtesy to:Matalam Municipal Police Station
