Nagpakita og abilidad si Jimuel Pacquiao, anak sa 8-division world champion nga si Manny Pacquiao, sa iyang labing una nga professional fight sa Estados Unidos. Gihimo ang away sa Pechanga Resort and Casino sa Temecula, California batok kang Brendan Lally sa Chicago.
Sa upat ka round nga sinukliay sa kumo, natapos ang away sa majority draw human migawas ang score nga 39-37 pabor kang Pacquiao ug duha ka 38-38 gikan sa ubang mga hurado. Atol sa kalihokan, didto sa ringside si Manny Pacquiao ug ang iyang asawa nga si Jinkee aron personal nga suportahan ang ilang kamaguwangang anak.
Ang away ni Jimuel kabahin sa undercard sa event nga gipasiugdahan sa Manny Pacquiao Promotions, nga labing una nga higayon nga naghimo og boxing card sa Amerika. Bisan pa man og medyo gikapoy sa ulahing bahin, nakabawi si Jimuel sa ikaupat nga round pinaagi sa isog nga sinukliay sa suntok.
Sa resulta, nagsugod ang iyang pro record sa 0-0-1, samtang si Lally pareho usab nga nakakuha og draw sa iyang debut.
Photo courtesy: Viva Promotions
