Mibalik sa aksyon si Renante “Limbas” Noblefranca human sa dugay nga pahulay ug wala gyud magpakita og kaluya sa iyang pagdaog pinaagi sa first-round stoppage batok sa kanhi pro boxer nga si John Ver Espra.
Ang maong away gipahigayon sa co-main event sa “Urban Turf Wars” ubos sa Urban Gladiators Fight League sa IEC Convention Center.
Miangkon og technical knockout sa unang round. Ang maong kadaugan dako og positibong epekto dili lang para kaniya kundili usab para sab sa Yaw-Yan ArDigma Cebu nga nagtinguha nga makaangkon pag-usab sa ilang dungog isip usa sa nag-una nga MMA ug kickboxing gym sa Sugbo human sa pila ka tuig nga nahilom ang ilang presensya.
Misulod si Noblefranca isip underdog batok sa mas eksperyensiyadong si Espra, apan iyang gigamit ang lig-on niyang kickboxing skills aron mapugngan ang kusog sa ex-pro boxer.
Kini na ang iyang ikaduhang kadaugan karong tuiga, human sa iyang away sa Zamboanga del Norte niadtong Hunyo.
Gidayeg ni Master Benigno “Ekin” Caniga Jr., ang founder ug CEO sa Yaw-Yan ArDigma, ang pasundayag ni Noblefranca. Matod niya nga si Espra misurender tungod sa knee injury nga nakuha gikan sa mga kusog nga leg strikes ni Noblefranca.
Tungod sa iyang impresibong porma, gipadayag ni Caniga nga gitarget nila ang pag-apil ni Noblefranca sa usa ka torneo karong Enero nga gi-promote sa usa ka Korean group sa Waterfront Cebu City Hotel and Casino. Apan mas dako ang ilang dugayng tumong ang makasulod si Noblefranca sa ONE Championship.
Photo Courtesy to: CDN Digital
