Gipaabot nga mosaka og lima hangtod pito porsyento karong tuiga ang elektronikong eksport sa Pilipinas, base sa nagpadayon nga panginahanglan sa bag-ong teknolohiya ug mga produkto sa telekomunikasyon, sumala sa Semiconductor and Electronics Industries in the Philippines Foundation Inc. (SEIPI).
Si SEIPI president Dan Lachica miingon sa mga tigbalita nga sa bag-ohay nilang board meeting, giaprubahan sa grupo ang bag-ong growth projection nga 5–7 porsiyento alang sa 2025.
Sa niaging tuig, ang elektronikong eksport sa nasod mikunhod og unom porsiyento ngadto sa $42.74 bilyon gikan sa $45.65 bilyon sa 2023. Apan base sa datos sa Philippine Statistics Authority, misaka og 9.5 porsiyento ang electronics exports sa unang siyam ka bulan karong tuiga ngadto sa $33.5 bilyon gikan sa $30.6 bilyon sa sama nga panahon sa miaging tuig.
Alang sa sunod tuig, gilauman sa SEIPI nga motubo pa og singko porsiyento ang electronics exports.
Matod ni Lachica, ang pag-uswag pagadumalahan sa teknolohiya nga gigamit karon sama sa artificial intelligence (AI), data centers ug telecommunication products. Bisan pa nga dili molihok ang Pilipinas sa paghimo og high-end o advanced chips, makahatag gihapon ang nasod og ubang bahin nga gigamit sa mga bag-ong teknolohiya.
Gipasabot usab niya nga ang semiconductor exports sa Pilipinas dili apil sa 19 porsiyentong reciprocal tariff nga gisugo sa US ubos sa bag-ong polisiya. Busa, matod niya, dili kini makahatag og dakong epekto tungod kay zero tariff gihapon ang elektronikong produkto sa nasod nga mosulod sa US.
Kaniadto, gianunsyo ni US President Donald Trump ang plano sa US nga magpataw og tariffs nga moabot og 300 porsiyento sa semiconductor imports, apan adunay exemption alang sa mga kompanya nga maghimo sa maong produkto sulod sa US.
Aron makadani og investment alang sa paghimo og high-tech chips, matod ni Lachica nga ang Pilipinas kinahanglan mopakita og proof of concept. Mao kini ang hinungdan nganong nagpursige ang SEIPI sa pagpatukod og lab-scale wafer fabrication facility nga makaproseso sa silicon wafers ngadto sa integrated circuits o chips.
Gidugang niya nga andam ang SEIPI nga i-resubmit ang proposal alang niini ngadto sa Department of Science and Technology.
Photo courtesy to: SEMI
