Plano matud pa sa administrasyong Marcos nga ideklarang terorista, sa sulod ug gawas sa nasud si Kanhi Ako Bicol partylist Rep Zaldy Co, aron malubong na siya uban sa kamatuoran kalabot sa bilyones pesos nga budget insertions ug uban pang mga anomaliya nga gihimo matod pa nila Pangulong Ferdinand Marcos Jr ug kanhi House Speaker Martin Romualdez sa 2025 national budget.
Kini ang unod sa pinakabag-ong exposé nga gipagawas ni resigned Ako Bicol partylist Rep Zaldy Co, human ang unang tulo ning mi-aging mga semana.
Sa iyang video statement, gipadayag ni Co nga dili siya maka-uli sa nasud tungod sa dili basta-bastang hulga sa iyang kinabuhi nga dugangan pa sa nakuha niyang impormasyong plano matod pa sa administrasyon nga ideklara siyang terorista sa sulod ug gawas sa nasud aron dali ra siyang mahipos uban sa kamatuoran.
Gipanghimakak usab niini ang gipasiatab sa Independent Commission for Infrastructure kon ICI ug ni kanhi DPWH-Bulacan 1st District Engr Henry Alcantara nga duna siya’y bahin sa bilyones pesos nga kwartang gikurakot gikan sa pundo sa mga flood control projects.
Hinuon gipadayag niini nga sukad niadtong tuig 2022 hangtud karong tuiga, ang kwartang mi-agi kaniya aron ihatag sa manag-agaw, miabot ngadto sa 56-bilyones pesos kondiin wala pa’y labot niini ang 100-bilyones pesos nga insertions sa pangulo sa 2025 national budget.
Gani niadtong tuig 2022 dihang milingkod na siya isip chairman sa House Committee on Appropriations, gisultihan na siya ni Romualdez nga kinahanglang magdeliver siya og dos-bilyones pesos matag-buwan.
Gisaysay pa niini nga paglabay sa pila ka adlaw, gibisita siya ni Engr Alcantara ug gitudluan sa paagi sa binahinay sa kickbacks.
via: BILYONARYO
