Mipagula ug travel advisory ang Department of Public Works and Highways (DPWH) Northern Mindanao alang sa Atugan Bridge sa Sayre Highway, Impasug-ong, Bukidnon, aron masiguro ang kaluwasan sa mga motorista ug maprotektahan ang integridad sa tulay.
Sumala sa advisory, ang light vehicles nga motimbang ug 5 tonelada o adunay unom (6) ka ligid paubos gitugotan nga makaagi sa duha ka lane. Samtang ang mga bug-at nga sakyanan ipa-inspeksyon una sa mga traffic personnel aron masiguro nga walay overloading sa dili pa motabok.
Ang maong lakang gisunod human sa slip-collapse nga nahitabo sa usa ka bahin sa Bukidnon–Davao (BuDa) Highway sa Quezon, ug hugot nga imonitor ang Atugan Bridge samtang nagpaabot sa pondo alang sa pag-retrofitting niini.
Ang Impasug-ong–Patulangan Bypass Road magamit lamang sa light vehicles nga adunay maximum gross weight nga 5 tonelada, ug magsilbi kini nga alternatibong rota.
Gisiguro sa DPWH Bukidnon 1st District Engineering Office ang pag-instalar sa mga traffic signage ug mga barriers, ingon man ang pagbutang sa mga personahe sa kaluwasan ug traffic management, aron maminusan ang kahasol sa mga motorista samtang nagpadayon ang mga preventive measures.
via: DPWH Region 10 – Northern Mindanao
