Magpatuman ang kagamhanan sa nasud Japan og pagsaka sa bayad sa pagpagawas og visa pagsugod sa fiscal year 2026 — kini ang unang higayon nga mopataas sila sa bayad human sa 48 ka tuig, sumala sa opisyal nga mga tinubdan kagahapong adlawa.
Lakip sa pagrepaso mao usab ang pagtaas sa bayad alang sa mga langyaw nga mag-apply sa pagbag-o o pag-renew sa ilang residence status. Sumala pa, nga ang maong lakang ipasaka sa umaabot nga komprehensibong economic measures sa nasud.
Sugdan matod pa ang implementasyon sa bag-ong bayad sa Abril 2026. Sa pagkakaron, ang bayad sa single-entry visa sa Japan, mokantidad sa 3,000 yen, nga mas ubos kung itandi sa mga bayad sa ubang nasud sama sa Estados Unidos nga moabot og USD185, United Kingdom nga 127 pounds, ug European Union nga 90 euros.
Tungod sa pagsaka sa gasto sa pag-isyu og visa, ang kagamhanan sa Japan, magpahamtang sa bag-ong bayad nga basehan sa mga rate sa ubang dagkong nasud. Dugang pa niini, ang dugang kita gikan sa pagtaas sa bayad, gamiton sumala pa aron pondohan ang mga lakang batok sa problema sa sobrang kadaghan sa mga turista o overtourism.
Photo courtesy to:Traveledictorian
