Nisaka sa 62% ang net income sa ikatulong quarter sa 2025 sa flag carrier nga Philippine Airlines (PAL) nga gipanguluhan sa negosyanteng Lucio Tan, samtang nagpadayon kini sa pagpatuman sa strategic transformation plan aron mapalambo ang operasyon ug kalig-on sa pinansyal nga kahimtang.
Sa pahayag sa PAL, ang total revenues sa ikatulong quarter nga natapos niadtong Setyembre 30, 2025, misaka og 3% ngadto sa $755 milyon, tungod sa mas daghang mga biyahe ug lig-on nga passenger volume nga 3.8 milyon ka pasahero.
Ang kita sa pasahero misaka og 1% ngadto sa $632 milyon, samtang ang ancillary income lakip ang seat upgrades ug baggage fees misaka og 25% kumpara sa parehas nga panahon sa miaging tuig. Samtang ang cargo revenues misaka usab og 2% ngadto sa $42 milyon, pinasikad sa mas taas nga bolyum sa kargamento.
Tungod sa performance sa ikatulong quarter, ang kita sa siyam ka bulan sa 2025 miabot na sa $159 milyon, nga 17% nga mas taas kumpara sa rekord sa parehas nga quarter sa miaging tuig.
Matod sa PAL, ang resulta nagpamatuod nga epektibo ang ilang transformation plan, nga naglakip sa pagpaayo sa operational efficiency, customer service, ug pagpalig-on sa competitive position sa internasyonal nga merkado sa airline industry.
Photo Courtesy to: Philippine Airlines
