Gimando ni Pangulong Ferdinand R. Marcos Jr. ang Department of Public Works and Highways (DPWH) nga ipatuman ang flood control master plan aron mapugngan ang padayong pagbaha sa lain-laing parte sa nasud.
Sumala ni DPWH Secretary Vince Dizon, apil sa plano ang mga estratehiya aron malikayan ang pagbaha sa Metro Manila ug sa uban pang dagkong siyudad sa Pilipinas.
Gipasabot usab ni Dizon nga nasagmuyo ang Pangulo tungod kay wala dayon naipatuman ang Flood Control Master Plan para sa Cebu nga gihimo pa sa tuig 2017.
Ang probinsya sa Cebu karon usa sa labing grabe nga naapektuhan sa kaylap nga pagbaha tungod sa pag-igo sa Bagyong Tino niadtong miaging semana.
Niadtong Martes, gihisgutan ni Dizon uban ang kanhi DPWH Secretary ug karon ICI Commissioner Rogelio Singson, National Irrigation Administration (NIA) Administrator Eduardo Guillen, ug ubang mga ahensya sa gobyerno ang detalye sa maong master plan.
Ang flood control master plan base sa pagtuon nga gihimo sa Japan International Cooperation Agency (JICA) pipila ka tuig ang milabay, nga nagtumong sa pagpalig-on sa sistema sa drainage, pagpahapsay sa mga sapa, ug pagpatukod og flood barriers aron mapanalipdan ang mga komunidad gikan sa grabeng pagbaha.
Sa pagkakaron, gipasiugda sa administrasyong Marcos ang lawom nga koordinasyon tali sa DPWH, NIA, ug lokal nga mga lider aron matuman ang plano ug malikayan ang sama nga trahedya sa umaabot.
Photo courtesy:GMA NEWS
