Nagdala ug kalibog sa social media ang sayop nga impormasyon kabahin sa kahimtang sa kanhi Senate President Juan Ponce Enrile, nga nag-edad ug 101 anyos kinsa kasamtangang anaa sa Intensive Care Unit (ICU) tungod sa pneumonia.
Niadtong Miyerkules, Nobyembre 12, 2025, si Katrina Ponce Enrile, anak ni Enrile, mipasabot sa publiko sa tinuod nga kahimtang sa iyang amahan ug nangayo og pag-ampo ug privacy para sa ilang pamilya samtang padayon ang pagtambal sa mga doktor.
Ang isyu misugod human si Senator Jinggoy Estrada nangayo og mga pag-ampo para kang Enrile atol sa sesyon sa Senado niadtong Martes. Human niini, daghang media outlets ug showbiz personalities ang nasayop og nag-post dayon og “In Memoriam” messages. Sa dihang nahibal-an nga buhi pa diay si Enrile, gi-delete dayon ang mga posts.
Apil sa mga personalidad nga nagpahayag og simpatiya mao sila Jay Sonza, Mike Yamson, ug ang dating aktres nga si Guada Guarin. Nahinumduman nga si Enrile kaniadto nakatabang sa mga artista, lakip na si Guarin, sa kaso niadtong dekada ’80 nga nalambigit ang aktres nga si Pepsi Paloma.
Ang pamilya nagpangayo nga hatagan sila og panahon ug kalinaw samtang ang 101-anyos nga senador nagpadayon sa iyang medical treatment.
via : Katrina Ponce Enrile FB
