Gipagawas sa prisohan si kanhi French President Nicolas Sarkozy human sa kapin 20 ka adlaw nga pagdetine, base sa mando sa Paris Court of Appeal niadtong Lunes nga nagtugot sa iyang temporaryong kagawasan ubos sa hugot nga judicial supervision.
Gisilotan si Sarkozy ug lima ka tuig nga pagkabilanggo sa Paris Criminal Court niadtong Sept. 25 tungod sa kaso sa “criminal conspiracy” nga may kalabotan sa giingong Libyan financing sa iyang 2007 presidential campaign. Gisugdan niya ang silot niadtong Oktubre 21 samtang nag-apelar sa maong desisyon.
Atol sa pagdungog pinaagi sa videoconference, gihulagway ni Sarkozy ang iyang pagpreso nga “lisod kaayo.”
Giingon sa korte nga dili na kinahanglan ipadayon ang pagdetine aron malikayan ang mga risgo sama sa pagpanghulga sa mga testigo, pakigkunsabo, pagpanagtag sa impluwensiya, o posibilidad nga makasala pag-usab.
Gibutangan siya og mga restriksiyon sa kontak ug gibawalan molakaw gawas sa Pransiya samtang nagpadayon ang proseso sa iyang apela.
SOURCE: France 24
