Gipaningkamotan sa Social Security System (SSS) nga mas masabtan sa mga miyembro ang mga benepisyo nga ilang makuha, pinaagi sa information lectures nga gihimo sa mga munisipyo, siyudad, ug barangay.
Matod ni Jose Roel J. Herbieto, Branch Head sa SSS-Iligan City Branch nga base sa ilang obserbasyon, daghan sa mga miyembro wala’y igong kahibalo sa ilang mga benepisyo. Gipasabot usab ni Herbieto ang mga qualifying conditions sa pipila ka benepisyo.
Pananglitan, alang sa maternity benefit, kinahanglan nga nakabayad ang miyembro og tulo (3) ka contributions sulod sa usa ka tuig sa wala pa manganak aron makadawat sa maternity benefits gikan sa SSS. Apan, kadtong dugay na nga wala nakabayad sulod sa tulo ka tuig kinahanglan nga mobalik sa pagbayad sa contributions aron makakuha og benepisyo.
Dugang pa ni Herbieto, kini nga impormasyon gipalapdan ug gipahibalo sa mga lugar nga ilang adtoan pinaagi sa information lectures, aron ma-edukar ug mapahimangnoan ang komunidad kabahin sa ilang mga katungod ug benepisyo sa SSS.
