Niabot na og unom ang ihap sa mga namatay human sa pagkusokuso sa Bagyong Uwan sa Pilipinas. Base sa datus sa National Disaster Risk Reduction and Management Council (NDRMMC) karong Martes, Nobyembre 11, gikompirmar sa ahensya nga tulo ang natala nga namatay gikan sa Cagayan Valley ug usa matag usa gikan sa Bicol, Western Visayas ug Eastern Visayas.
Samtang 13 ka mga tawo ang gikataho nga naangol. Tungod niini, kapin sa 2 milyones ka indibidwal o katumbas sa kapin 600,000 ka pamilya ang apektado karon sa Iloco Region, Cagayan Valley, Cordillera Administrative Region, Central Luzon, Metro Manila, CALABARZON MIMAROPA, Bicol, Western Visayas, Negros Island Region, Eastern Visayas, Zamboanga Peninsula, Northern Mindanao, Caraga, ug sa Muslim Mindanao.
Ang pinakataas nga ihap sa mga apektadong indibidwal natala sa Bicol nga niabot og kapin sa usa ka milyon, gisundan sa Negros Island Region ug Eastern Visayas. Sa mga apektadong pamilya, kapin sa 200,000 ang anaa pa sa mga evacuation centers samtang ang uban, kapin sa 78,000 ka pamilya, nagpasilong sa ubang mga lugar.
Sa pagsusi sa kadaot sa ahensya, kapin sa 4,000 ka mga balay ang gikataho nga naguba, diin kapin sa 3,000 ang gamay nga nadaot samtang kapin sa 700 ang hingpit nga naguba. Kon supply sa kuryente ang hisgutan, padayon gihapon nga nasinati ang pagkapalong sa kuryente sa 394 ka lugar nga naigo sa bagyo.
Base sa NDRRMC, ang kagamhanan nihatag na og kapin sa Php48 milyones nga hinabang alang sa mga biktima sa bagyo. Kaniadtong Lunes sa buntag, ang Bagyong Uwan nigawas na sa Philippine Area of Responsibility apan gipaabot nga musulod pag-usab sa PAR ug mopaingon sa Taiwan.
Source:Bombo
Photo courtesy to:Daily Tribune
