Gideklara ang usa ka tuig nga state of national calamity si Presidente Ferdinand “Bongbong” Marcos Jr. sa tibuok Pilipinas isip tubag sa grabeng kadaot nga dala sa Bagyong Tino.
Ubos sa Proclamation No. 1077, gimandoan sa Presidente ang tanang ahensya sa gobyerno nga ipadayon ang ilang paspas nga pagtubag ug paghatag dayon og tabang sa mga lugar nga grabeng naapektuhan sa bagyo. Kini nga lakang nahiuyon sa mga rekomendasyon gikan sa National Disaster Risk Reduction and Management Council (NDRRMC).
Gipasiugda ni Presidente Marcos ang pagkadinalian sa pagpadali sa mga operasyon sa pagtabang, mga paningkamot sa rehabilitasyon, ug ang pagbangon sa mga komunidad nga naguba sa bagyo. Isip kabahin sa deklarasyon, giaprobahan sa gobyerno ang pag-allocate og ₱760 milyon nga tabang pinansyal sa mga local government unit (LGU) nga grabeng naapektuhan sa Bagyong Tino. Ang mga pondo gituyo aron suportahan ang emergency relief, pag-ayo sa imprastraktura, ug tabang alang sa mga residente nga nawad-an sa ilang panginabuhi.
Ang proklamasyon naghatag usab sa gobyerno og awtoridad sa paggamit sa mga pundo sa kalamidad, pagpatuman sa mga lakang sa pagkontrol sa presyo, ug pagpamalit og mga suplay sa emerhensya aron masiguro nga ang mga panginahanglan sa mga apektadong Pilipino matubag dayon.
Samtang, ang National Disaster Risk Reduction and Management Council nagtaho nga kapin sa usa ka milyon nga mga residente sa Luzon ug Visayas ang gipabakwit tungod sa bag-o lang nga epekto sa Super Typhoon Uwan, nga miigo sa Bicol Region kagahapon.
Ang deklarasyon sa Presidente nagtumong sa paghatag og mas paspas ug mas koordinado nga tabang sa mga naapektuhan ug pagpadali sa pagbangon sa nasud gikan sa usa sa labing makadaot nga bagyo sa tuig.
via: THE SUMMIT EXPRESS
