Nag-atubang sa hulga sa kaylap nga pagbaha ang Northern Luzon tungod sa gipaabot nga kusog nga pag ulan nga dala sa Bagyong Uwan, sa higayon nga kini landfall na sa yuta sa nasud.
Matod ni Romeo Ganal Jr., labaw sa PAGASA Northern Luzon, nga posibleng mobundak og kusog nga ulan ang bagyo sa kabukiran sa Cordillera Administrative Region ug Cagayan Valley.
Tungod niini, matod niya, ang pag-ulan mahimong modagayday ngadto sa mga komunidad sa duha ka nahisgutang rehiyon, hinungdan sa pag-awas sa tubig. Gibanabana sa weather bureau nga moabot sa 200 millimeters nga uwan ang posibleng mobundak sa Northern Luzon, apan dunay posibilidad nga mosaka kini ngadto sa 300 MM ngadto sa 400 MM.
Gumikan niini, matod niya mas maayong mobakwit og sayo ang mga residente ilabi na sa lugar nga bahaonon.
Dugang ni Ganal, taas usab ang hulga sa storm surge sa eastern seabord nga delikado kaayo sa mga marinero ug mangingisda. Matod niya nga posibleng makaabot kini sa Ilocos Region, bisan og anaa na kini sa northwestern seaboard sa nasod.
Photo Courtesy to:PNA
