Gipahimuslan sa Sacramento Kings ang wala pagdula sa mga star players sa Golden State Warriors aron iposte ang ikatulo nilang daog sa season, sa score nga 121-116.
Ang triple-double king nga si Russell Westbrook maoy nangulo sa Sacramento sa iyang 23 puntos, 16 ka rebounds, ug 10 ka assists samtang nagduwa isip forward gikan sa iyang naandang posisyon sa pagbantay.
Ang midrange specialist nga si DeMar DeRozan niamot og 25 puntos. Tungod wala pagdula sa mga star players sa Warriors sama nila ni Stephen Curry, Draymond Green, ug Jimmy Butler, pipila sa mga bench player sa team ang mipuli.
Diin ang rookie sa Warriors nga si Will Richard miiskor og 30 puntos ug pito ka rebounds samtang si forward Jonathan Kuminga miposte og 24 puntos ug siyam ka rebounds.
Kun asa ang GSW naggunit pa sa labaw sa unang bahin sa duwa apan ang Kings misuway paggukod niini sa 3rd quarter. Nakigbisog gihapon ang Warriors sa 4th quarter apan sa kataposan, mipatigbabaw ang batikang depensa sa Kings ug ilang gitapos ang duwa, nga naggunit og 5 puntos nga labaw.
Bisan pa man og wala makaduwa ang mga star players sa Warriors, ang team nakamugna og 17 ka 3-pointers samtang ang Kings igo lang nakahimo og 11 ka tres. Hinuon, gibantayan sa Sacramento ang paint area ug miiskor kini og 54 puntos kon itandi sa 40 puntos nga nahimo sa Warriors.
Kini ang ikaupat nga kapildihan sa GSW karong season, nga naggunit og lima ka daog nga rekord.
Photo Courtesy to:GMA Networks
