Gisiguro sa Department of Agriculture (DA) nga magpabilin nga lig-on ang suplay sa bugas bisan pa sa kadaot nga gidala sa bagyong Tino.
Sumala ni Agriculture Secretary Francisco Tiu Laurel Jr., wala sila nabalaka sa epekto sa bagyo tungod kay hapit na matapos ang harvest season sa mga probinsya nga nagaproduce og bugas.
Gidugang pa niya nga ang mga lugar nga naapektuhan sa bagyo dili mga rice-producing areas, busa dili kini makahatag og dako nga epekto sa suplay sa bugas sa nasud.
Gisiguro usab sa National Food Authority (NFA) nga adunay igo nga stock sa bugas aron matubag ang panginahanglan sa publiko.
Bisan pa man lig-on ang suplay sa bugas, giangkon sa DA nga usa ra ka sektor ang ilang gikabalak-an — ang industriya sa mais, tungod kay kapin 33,000 ka hektarya sa mga tanoman sa mais ang naapektuhan sa bagyong Tino.
Padayon karon ang assessment sa ahensya aron masuta kung pila ka porsyento sa produksyon sa mais ang posibleng mawala ug kung unsay mga lakang nga angay buhaton aron dali nga makabawi ang mga mag-uuma.
Photo courtesy to: Dreamstime.com
