Gipa-andam na sa Department of Agriculture (DA) ang mga mag-uuma ug mananagat batok sa posibleng epekto sa umaabot nga bagyong Uwan, nga gilauman nga makasulod sa nasud sa mga mosunod nga adlaw.
Pinaagi sa DA–Disaster Risk Reduction and Management Office (DA-DRRMO), gibtyag nga anihon na sa mga mag-uuma ang mga tanom nga andam nang anihon sa dili pa moabot ang bagyo, aron malikayan ang kadaot sa mga uma.
Gisugo usab sa ahensya ang pag-relocate sa mga reserbang binhi, abono, kagamitan sa pagtanom, ug uban pang mga gamit-panguma ngadto sa mas luwas nga lugar nga dili maabot sa tubig-baha. Apil usab niini ang pagpasilong sa mga kahayupan, pagkaon, ug tambal aron masiguro ang ilang kaluwasan.
Gimanduan usab sa DA ang paglimpyo sa mga kanal sa irigasyon aron malikayan ang pagbaha ug aron mas paspas ang pag-agos sa tubig kon magsugod ang ulan.
Samtang gimanduan usab ang mananagat nga ibutang sa luwas nga dapit ang ilang mga bangka nga pangisda aron malikayan ang kadaot. Girekomendar usab ang early harvest sa mga isda ug aquaculture products, labi na sa mga lugar nga pirming bahaon.
Matod pa sa Department of Agriculture, padayon silang nakabantay sa kahimtang sa mga umahan ug kadagatan, ug nagaposisyon na sila og agricultural inputs ug ayuda aron dayon nga matabangan ang mga apektadong mag-uuma ug mananagat kon mosulod na ang bagyo.
Photo courtesy: PHILSTAR
