Nasikop sa mga personahe sa Bureau of Immigration (BI) ang usa ka lalaking Chinese atol sa gikasang operasyon diin nasuta nga siya nag-operate ug residence-based cryptocurrency investment scam.
Giila ang suspetsado nga si Liu Feng, 41 anyos kinsa gidakop sulod sa usa ka condominium sa Diosdado Macapagal Boulevard sa Barangay Tambo, Parañaque City, niadtong nakalabay nga adlaw human nasakpan sa akto nga nag-operate sa usa ka workstation nga gisuspetsahan nga nagpahigayon sa cryptocurrency scam.
Sumala sa BI nga sila nakadawat ug mga taho gikan sa mga tawo diin ang nasikop nga suspek maoy unang subject sa imbestigasyon nga nagpadagan sa online fraud operation uban sa ubang mga cohorts.
Dugang pa nga ang dinakpan nag-overstaying sa Pilipinas ug wala na kini mi-apply pag usab sa extension sa iyang visa sukad niadtong Oktubre 2024. Nasayran sab nga atol sa maong operasyon nakuhaan kini ug gidudahang drug paraphernalia sa iyang workstation.
Sa pagkakaron ang suspek gikustodiya na sa Crime Investigation and Detection Group ug gikatakdang mopailawom sa deportation proceedings ug gidid-an na kini sa pagbalik sa nasud.
Photo Courtesy to:MSN
