Nagpadayon ang Bayanihan Project sa Disaster and Recovery Initiative sa lokal nga panggamhanan sa syudad sa Malaybalay aron matabangan ang mga residente nga naigo sa kalamidad ug nawagtangan og panimalay.
Gibutyag ni City Urban Development and Housing Office Head Perfecto Ray Bayo Jr. atol sa gipahigayong Kapehan sa City Hall of Malaybalay, adlawng Miyerkules, Oktobre 29, 2025 nga nagtinabangay ang mga stakeholders sa syudad aron mahatagan ug saktong mapuy-an ang mga residente nga kinahanglang i-relocate didto sa Purok 6, Barangay San Jose kung asa sa pagkakaron, halos 90% na ang pagkumpleto sa mga balay samtang gihulat ang koneksyon sa patubig.
Matod pa ni Bayo, andam na ang mga linya sa kuryente, apan ang linya sa tubig nag-atubang og gamay nga problema nga gilauman masulbad sa sunod tuig pinaagi sa Imbayao-Kulasihan Water Supply Project.
Gidugang usab ni Bayo nga mismo si Mayor Atty. Jay Warren Pabillaran ang nag-aproba sa paghatag og pondo nga kapin sa ₱2.3 milyon alang sa mga materyales sa 20 ka panimalay, samtang ang mga stakeholders ang nagtabang sa labor costing ug konstruksyon isip boluntaryong pagpaningkamot.
Ang proyekto usa ka ehemplo sa kolaborasyon sa lokal nga panggamhanan, pribadong sektor, ug komunidad aron masiguro ang proteksyon ug kaluwasan sa mga residente nga naapektuhan sa kalamidad.
via: City Government of Malaybalay
