Gihatagan sa Department of Social Welfare and Development (DSWD) Field Office 10 sa psycho-emotional support ug pinansyal nga tabang ang nahibiling mga anak sa magtiayon nga sila Ely ug Thelma Ubatay, nga namatay human matabunan sa landslide sa Barangay Palacapao, Quezon, Bukidnon, niadtong Oktubre 18, 2025.
Gipadayag ni Oliver Badel Inodeo, Public Information Officer (PIO) sa DSWD-10, sa eksklusibong pakighinabi sa Juander Radyo Malaybalay nga personal mibisita ang mga social worker gikan sa DSWD Maramag Satellite Office sa panimalay sa mga biktima aron mapailalom sa psychological processing ug mapalig-on ang ilang emosyonal nga kahimtang taliwala sa trahedya ug gitunol ang ₱20,000 financial assistance aron masuportahan ilang panginahanglan.
Dugang pa ni Inodeo nga wala lamang sila nagatutok sa usa ka sitwasyon sa kalamidad, kondili padayon usab ilang pag-monitor ug paghatag dugang panginabuhian alang sa mga pamilya nga naapektuhan sa baha ug sunog sa tibuok Rehiyon 10, ilabina sa lalawigan sa Bukidnon samtang gipasalig nga kini maoy usa sa mandato pagkatukod sa ahensya.
Sa pagkakaron, nagpadayon ang DSWD-10 sa pag-assess sa kahimtang sa mga biktima aron masiguro nga makadawat sila og suporta gikan sa gobyerno.
Ang ahensya nag-awhag usab sa publiko sa pagpakabana ug pagtinabangay aron mapadali ang pagbangon sa mga pamilya nga apektado sa trahedya
via: DSWD 10
