Malas ang naangkon sa usa ka Brazilian human nakuha sa CCTV footage ang iyang pagdaob sa iyang Porsche sports car aron unta makuha ang insurance money.
Gikataho nga niadtong Oktubre 5, ang Civil Police sa Paraná, Brazil, gi-contact sa usa ka lalaki kinsa miangkon nga gipara daw kini og mga armadong sibilyan nga misulod sa iyang sakyanan nga Porsche 911 Carrera sa wala pa gimaneho kini sa bukirang bahin sa Lapa ug gisunog.
Giangkon sa lalaki nga naluwas ra siya sa sunog kay daling gibira siya sa mga nanglabay nga nakadungog sa iyang syagit sa nasunog niyang sakyanan nga nakahiagom pa gani kini og paso sa lawas.
Gisaysay niya sa kapulisan nga wala niya mailhi ang mga indibidwal nga nanghulga kaniya og gibaharan pa nga patyon. Kini ang nakapa-aghat og paglusad sa makuting imbestigasyon sa kapulisan sa maong makahibulong nga panghitabo.
Sa dihang nakakuha na og mga ebidensya ang mga awtoridad, migawas sa imbestigasyon nga gimugna ra sa biktima ang istorya ug nasakpan pa nga siya mismo ang misunog sa iyang sports car sa maong dapit. Sa rason nga aron makakuha og insurance money nga balor nga $120,000 USD o kapin sa ₱ 7,000,000 aron ibayad nga iyang utang sa buhis.
Photo Courtesy: vecteezy
