Gitahasan ni National Irrigation Administration (NIA) 9 Regional Manager Engr. June Nathaniel S. Plaza ang tanang mga NIA managers ug uban pang mga personahe sa pagpalig-on sa kolaborasyon tali sa mga mag-uuma.
Atol sa Flag Raising Ceremony nga gipahigayon siya miingon kon mahimo duawon ang mga mag-uuma katulo sa usa ka semana o moapil sa gipahigayong Turn-Out Service Area Group (TSAG) meetings aron mahibaluan ang mga hagit nga sagad gi-atubang sa mga mag-uuma.
Iyang gihatagan ug gibug-aton nga dili lang kutob sa paghimo ug irigasyon ilang trabaho apan lakip na usab ang pagsuta sa kahimtang sa mga mag-uuma sama na lang kon sila nakasinati ug simpleng diarhea ug wala silay kapaingnan gumikan sa kakulang sa panalapi.
Gipasabot ni RM Plaza nga ang kanunay’ng pagpaduol sa mga personahe sa NIA-9 ngadto sa mga mag-uuma nakamugna sa pagsalig ug paglaom sa mga mag-uuma panahon sa kalisod.
Gisaysay ni RM Plaza pinaagi sa paghatag panahon diha sa pagbisita sa mga kaumahan, mahimo nang makahatag ang NIA-9 sa dinaliang tubag aron matabangan ang mga mag-uuma nga mapalambo ilang produksyon ug mabuhi ilang matag usa nga pamilya.
Photo Courtesy to:niazamboangapeninsula
