Gipalihok ni Armien Alorro, ang Hepe sa Iligan City Disaster Risk Reduction and Management Office (ICDRRMO), ang mga residente ug opisyal sa Iligan nga mag-amping ug mangandam batok sa kapeligro sa linog, human masuta nga adunay fault plane sa Tagoloan, Lanao del Sur, nga posibleng mabati hangtod sa Iligan.
Gipasidaan usab niya nga posibleng maguba ang pipila ka mga estruktura tungod kay daghan sa mga building sa syudad sa Iligan ang karaan na ug aduna pay mga balay nga dili pulido ang pagkatukod.
Gitudloan usab ni Alorro ang mga opisyal kung unsay buhaton sa aktong pagsinati sa linog lakip na ang pag-andam sa Go Bag, kung kinsa ang kinahanglan nga una nga ipa-evacuate, asa dad-on ang mga residente, ug unsaon paglikay sa mga insidente nga makahatag ug dugang peligro.
Matod niya, ilang bisitahon ang matag barangay aron magtudlo sa hustong pagresponde sa emerhensiya. Giawhag usab ni Alorro ang mga opisyal sa barangay nga tigumon ang mga tanod, health workers, ug volunteers alang sa kaluwasan sa komunidad.
Gipahimangnuan usab ang mga barangay nga ilhon ang mga lugar nga posibleng mas maapektuhan ug sa mga hazards nga anaa sa ilang dapit. Dugang pa ni Alorro, magpahigayon sila ug mga drills aron mahasa ang kaandam sa tanang sektor.
Kini nga kalihukan kabahin sa pagtuman sa Memorandum sa Office of the Civil Defense-10 nga nagmando sa pagpalapad sa impormasyon kabahin sa Earthquake and Tsunami Early Warnings ngadto sa tanang kabaranggayan.
