Nibutyag si Atty. Richard Anthony Fadullon, Prosecutor General sa National Prosecution Service nga gawas sa magtiayong Discaya, giingong ‘selective’ usab ang pipila ka mga testigo nga midangop sa Department of Justice. Nagtuo si Prosecutor Fadullon nga pipila kanila wala pa mopadayag sa ilang hingpit nga kahibalo kalabot sa anomaliya sa flood control projects.
Diin matod niya nga pilion ang ubang mga saksi kon kinsa ug unsa nga mga pangalan ang ilang ilambigit sa isyu sa kurapsyon. Dugang pa ni Atty. Fadullon, gitawag kini og selective memory o selective amnesia tungod kay ang uban kanila kalit nga makalimot sa dihang pangutan-on kung kinsa ug pila ang ilang nahibal-an.
Subay niini, gipahibawo nga dili dayon sila motuo kung unsa ang ‘testimonies’ nga ipaambit kanila sa mga saksi nga nangabot. Matod niya nga moagi pa kini sa mga evaluation aron masuta ang mga detalye ug impormasyon sa higayon nga madayon ang kaso ug magpadayon sa korte.
Kini bisan pa sa pag-angkon sa opisyal nga ‘nawala’ ang tanan ilabi na sa aspeto sa mga saksi nga nagtug-an sa tanan nga sagad hisgutan.
