Interesado makig-atbang sa 46-anyos nga Filipino boxing legend Manny “Pacman” Pacquiao ang kampo ni Irish fighter Lewis Crocker, nga kasamtangang naghupot sa International Boxing Federation (IBF) welterweight title, ugaling dili madayon ang umaabot niyang away batok kang Rolly Romero.
Si Jamie Conlan, manager ni Crocker, niingon nga iya nang gikontak si Sean Gibbons, ang dugay nang kauban ni Pacquiao sa iyang mga away, aron ipadayag ang ilang intensyon.
Si Pacquiao gikatakdang makigsangka kang Romero, ang kasamtangang WBA welterweight champion, sa Enero 2026, apan posible maoktaba human ang World Boxing Association mimando kang Romero nga depensahan ang iyang titulo batok sa mandatory challenger nga si Shakhram Giyasov.
Kung dili madayon kining maong showdown, abli ang pultahan alang sa wala’y pildeng si Crocker (22 ka daog, 11 pinaagi sa knockout), kinsa mibanos sa pagkaprominente human mapilde si Paddy Donovan niadtong Setyembre aron makuha ang IBF welterweight crown.
Si Pacquiao nagtinguha nga mabawi ang kampiyonato human mitabla ni WBC welterweight champion Mario Barrios niadtong Hulyo. Gawas sa pagbawi sa korona, ang kanhi 8-division world champion nagtinguha usab nga mabuak ang iyang kaugalingong rekord isip labing karaan nga welterweight champion sa kasaysayan — usa ka titulo nga una niyang nahuptan niadtong 2019 human gipildi si Keith Thurman sa edad nga 40.
Bisan og wala pa kini kompirmado, nagkainit ang espekulasyon ug ang mga fans naghinam-hinam nga makita kung kinsa ang sunod nga ikasangka sa “Pambansang Kamao” sa kataposang hugna sa iyang legendary career.
via : AFP/ Manny PAcquiao
