Gipagawas sa Securities and Exchange Commission o SEC ang usa ka cease and desist order batok sa Microdot Lending Corporation, ang operator sa mga online lending platforms sama sa Credit Cash ug Credit Peso.
Sumala sa SEC, ang kompanya nangolekta og utang pinaagi sa dili patas nga pamaagi nga nagpahamtang og dakong kadaut sa mga nangutang. Lakip sa mga naapektuhan sa order mao ang uban pa nilang apps sama sa MF Cash, Pesoloan Mart, Cash Baka, Cash Mabilis, Go Peso, Instant Loan ug Timely Loan.
Gidugang sa SEC nga wala usab gisulti sa Microdot ang operasyon sa Credit Peso Pro ug MF Cash, nga supak sa Memorandum Circular No. 19 s. 2019 nga nagkinahanglan sa tanang lending firms nga magsumite sa listahan sa ilang online lending platforms.
Ang Microdot gitumbok nga wala misunod sa mga show cause letters ug audit findings sa ahensya. Ang SEC nagpahimangno nga ang paglapas sa balaod ug dili patas nga pagpangolekta makahatag og dakong kadaut sa katawhan nga nangutang, busa gikinahanglan kining hunongon dayon.
SOURCE: ABS CBN NETWOK
