Nagkaguliyang ang mga residente duol sa tulay sa Crystal Sugar Company Inc. sa North Poblacion, Maramag Bukidnon human makaplagan ang patay’ng lawas sa usa ka bata pasado alas 11:30 sa buntag kagahapon Oktubre 16, 2025.
Sa inisyal nga taho, ang mga mangisdaay sa maong dapit maoy unang nakadiskubre sa lawas sa bata nga naglutaw-lutaw sa suba ug dali nilang gireport sa kapulisan ang panghitabo.
Gibutyag ni Police Lieutenant Colonel Alexander Eugenio sa Maramag Municipal Police Station sa pakighinabi sa Juander Radyo Malaybalay nga usa ka bag-ong nahimugso nga bata ang nakaplagan sa Pulangui Rivers sa nasangpit nga lugar nga posibleng gilabay uban sa mga basura diin aduna pay inunlan nakakonekta sa tiyan niini.
Sa karon padayon pang giila ang inahan sa bata ug nanawagan ang hepe sa katawhan nga makigtambayayong sa imbestigasyon aron mahatagan sa tukmang silot ang inahan nga nagbuhat niini.
via: Maramag PNP
