Gikomperma ni Department of Health DOH Sec. Ted Herbosa nga adunay 297 ka Super Health Centers gikan tuig 2021 nga nakabalandra ug wala pa magamit. Gisusi ni Herbosa ang Concepcion Dos, Super Health Center sa Marikina, nga usa lamang sa mga nasangpit nga Super Health Centers.
Naabtan sa mga kawani sa DOH ang maong dapit nga natabonan na sa tag-as nga mga tanom ug adunay puthaw nga pundasyon, ug nahuman sa kantidad nga Php21.5-M. Base sa report, kini ang nahuman nga PHASE 1 sa nasangpit nga proyekto.
Sumala pa, nga una nang nadiskubrehan sa DOH nga sa orihinal nga plano, 2-storey medium-sized nga health center sa Concepcion Dos unta ang tukoron. Diin ang maong pasilidad magsilbi unta nga primary health care facility.
Hinuon, nausab ang lokasyon ug mga plano sa LGU ug nahimong 4-storey ang plano sa super health center nga dunay dugang rooftop nga nagpasabot nga mas taas ang pundo nga gikinahanglan niini nga mokabat ngadto sa PHP180-M.
Kung sumahon, anaa sa Php201-M gikan sa giusang Php21.5-M nga Phase 1 ug dugang Php180-M ang kinahanglan sa matod pa sa LGU para sa maong bag-ong plano nga SHC.
Samtang sa pikas bahin, gikatakdang dalhon karong adlawa Oktubre 17, 2025 ni Sec. Herbosa ang listahan sa 297 ka mga SHC ngadto sa Indipendent Commission for Infrastructure (ICI) alang sa pagpadayon sa nasugdang imbestigasyon sa DOH.
Nasayran nga base sa pagtuon sa maong departamento ug nomenclature sa health facilities sa nasud, makapatukod na og usa ka medium-sized nga health center sa kantidad nga Php12-M.
Photo courtesy to: Manila Standard
