Padayon ang pagsaka sa cash remittances nga gipadala sa mga Overseas Filipino Workers (OFWs), nga miabot sa US$2.98 bilyon niadtong Agosto 2025, mas taas og 3.2% kumpara sa $2.89 bilyon sa samang bulan niadtong Agosto 2024.
Gikan sa maong kantidad, US$2.35 bilyon ang kontribusyon sa mga land-based nga OFWs, samtang US$626 milyon ang gikan sa mga sea-based nga mga trabahante.
Sa tibuok tuig gikan Enero hangtod Agosto 2025, ang total nga cash remittances misaka ngadto sa US$22.91 bilyon, kumpara sa US$22.22 bilyon sa parehas nga yugto niadtong milabay nga tuig.
Ang Estados Unidos nagpabiling pinakadakong tinubdan sa remittances, gisundan sa Singapore ug Saudi Arabia. Tungod sa pagtaas sa cash remittances, misaka usab ang personal remittances nga niabot sa US$3.31 bilyon karong Agosto 2025, gikan sa US$3.20 bilyon sa samang bulan niadtong 2024.
Sa kinatibuk-an, ang personal remittances gikan Enero hangtod Agosto 2025 nitubo ngadto sa US$25.51 bilyon, mas taas og 3.1% kumpara sa US$24.75 bilyon sa kaparihas nga panahon niadtong miaging tuig.
Photo courtesy to: BusinessWorld
