Gipahinumdoman pag-usab sa Department of Trade and Industry (DTI) ang publiko nga awtomatikong ipatuman ang “price freeze” sa presyo sa mga nag-unang palaliton sa mga lugar nga gideklara nga ubos sa state of calamity tungod sa kusog nga linog.
Sumala sa DTI, nagpadayon na ang hugot nga pagmonitor sa mga presyo sa merkado uban sa regional ug provincial offices sa ahensya aron malikayan ang pagpang limbong sa presyo, overpricing, ug hoarding sa panahon sa krisis.
Gihangyo usab sa DTI ang mga negosyante nga magpabilin nga makatarunganon ug matinud-anon sa ilang pagpamaligya, ilabi na karon nga nag-antos pa ang daghang mga komunidad tungod sa sunod-sunod nga kalamidad.
Gipasalig sa ahensya nga padayon nilang panalipdan ang mga konsumidor ug tabangan ang mga negosyanteng naapektuhan sa linog aron sila makabangon ug makapadayon sa kalihokan sa ekonomiya.
Samtang, gibutyag usab sa DTI ang mga konsumidor sa mga apektadong lugar nga ipaabot dayon sa DTI Consumer Care kon adunay makita nga pag-abuso sa presyo o dili patas nga pamaligya sa merkado.
Photo courtesy: Philippine Information Agency
