Nagpadayon ang temporaryong ceasefire tali sa Israel ug Hamas sa Gaza atol sa paghulat sa pagpagawas sa mga bihag nga Israeli ug mga bilanggo nga Palestinian.
Sumala ni Shosh Bedrosian, tigpamaba sa gobyerno sa Israel, nga gilauman nga magsugod karong Lunes sa buntag ang pagpagawas sa mga bihag, diin 20 ka buhi nga hostage ang dungan nga ipagawas.
Gidugang pa ni Bedrosian nga andam na ang Israel nga modawat sa mga bihag kon mapagawas kini mas sayo pa sa gilauman. Human niini, isunod ang pagpagawas sa mga patayng lawas sa 28 ka mga bihag.
Samtang, gilauman nga moabot karong adlawa si US President Donald Trump sa parlamento sa Israel, sa dili pa siya molarga paingon sa Egypt, alang sa usa ka world leaders’ summit nga maghisgot sa katapusan sa gubat sa Gaza.
Photo courtesy: Hindustan Times
