Gisugyot sa hawanan sa konseho ang sa usa ka joint committee meeting tali sa management sa usa sa mga mall sa Cagayan de Oro City aron hisgutan ang mga reklamo sa social media bahin sa ilang polisiya sa paradahan sulod sa ilang lugar.
Sa iyang special report, gihisgotan ni Konsehal Roger Abaday atol sa regular nga sesyon sa konseho ang bahin sa usa ka open letter nga nag-viral sa social media nga nagsaway sa polisiya sa paradahan sa management sa mall nga nagpugong sa pag-access sa mga motorista.
Matud ni Abaday, ang management sa mall nagbutang og mga babag sama sa mga tanum nga naa sa kaldero aron babagan ang pipila ka lugar sa paradahan. Matud niya, nakahatag kini og kalisud sa mga motorista nga nagdali-dali lang sa ilang mga errands, drop-offs, o pick-ups.
Miingon si Konsehal Abaday nga samtang ang Limketkai mall management ang tag-iya sa propiyedad, ang mga establisemento sa negosyo gikinahanglan gihapon sa Building Code of the Philippines ug mga ordinansa sa siyudad nga mohatag og igong lugar paradahan base sa ilang floor area.
Gisugyot ni Abaday nga dapiton ang mga opisyal ug representante sa Limketkai Center sa usa ka joint committee meeting nga maglambigit sa Committee on Public Utilities, Office of the Building Official, Roads and Traffic Administration (RTA) ug sa City Planning and Development Office aron sulbaron ang mga reklamo.
Photo courtesy: City Information Office
