Mokabat na sa 10,006 ang kinatibuk-ang ihap sa aftershocks nga natala kalabot sa Magnitude 6.9 nga linog nga nitay-og sa Sugbo niadtong Septiyembre 30, 2025.
Sa pinakabag-o nga report sa Philippine Institute of Volcanology and Seismology (PHIVOLCS), mihinay na kini apan posibleng maglungtad pa.
Samtang, na-plot sa PHIVOLCS ang 1,767 usab ka aftershocks. Kini ang mga na-detect sa duha o daghang mga istasyon base sa ilang monitoring.
Nabatyagan sa mga residente ang 44 niini apan ang kadaghanan natala lamang sa mga pasilidad.
Ang magnitude range niini gikan sa 1.0 hangtod 5.1.
Matod sa PHIVOLCS, padayon ang ilang pagmonitor sa mga aftershocks gamit ang seismic monitoring stations sa rehiyon.
Nakahatag ang magnitude 6.9 nga linog og kabalaka sa mga lumolupyo sa Sugbo ug sa mga silingang probinsiya, hilabi na sa mga lugar duol sa baybayon.
