Nagpaabot og tabang ang probinsya sa Cotabato alang sa mga biktima sa 6.9 magnitude nga linog nga miigo sa Cebu niadtong miaging semana, pinaagi sa pagpadala og relief operation ug libreng serbisyo alang sa mga kahayopan.
Sumala ni Governor Emmylou “Lala” Taliño-Mendoza, gipangulohan sa Provincial Government of Cotabato ang usa ka tibuok probinsiyang relief mission uban ang mga lokal nga panggamhanan sa Kabacan, Banisilan, Magpet, M’lang, Pigcawayan, Pres. Roxas, Libungan, Aleosan, Midsayap, Pikit, Tulunan, Antipas, Matalam, Makilala, Arakan, ug Carmen.
Apil usab sa nagpaabot og tabang ang Blue Green Poultry ug Sun Stone Construction and Supply. Human sa mga panagpulong ug pagplano uban ang mga department heads sa Kapitolyo, nakatakda nga molarga ang grupo gikan sa Cotabato karung, Oktubre 10, 2025, aron personal nga ihatag ang ayuda sa mga naapektuhan sa Cebu.
Lakip sa mga ipanghatag ang food ug non-food items, samtang ang mga beterinaryo sa Office of the Provincial Veterinarian maglusad usab og libre nga animal mission sa mga lugar nga pinakagrabe ang kadaut.
Matud pa ni Governor Taliño-Mendoza, sa panahon sa kalisdanan, ang panaghiusa, pagtinabangay, ug pagpakita sa tinuod nga pagpakabana mao ang tinuod nga timaan sa kaisog ug kalig-on sa katawhang Pilipino.
Photo courtesy to:Provincial Government of Cotabato
