Nagpadayag og kabalaka ang civil society group nga Bangon Sambayanan sa pagkatudlo ni Justice Secretary Jesus Crispin “Boying” Remulla isip bag-ong Ombudsman, nga ilang gihulagway nga “sumpa ug delubyo” alang sa katawhang Pilipino.
Sumala ni Jeffrey “Ka Eric” Celiz, Secretary General sa grupo, ang usa ka Ombudsman kinahanglan adunay “delicadeza” ug integridad, apan matod niya, wala kini makita sa kaso ni Remulla.
Gipasabot ni Celiz nga naay kakulang sa moral nga pamatasan ang maong opisyal tungod kay gitabangan niini ang iyang anak nga makalingkawas sa kaso human masakpi nga nagpalusot og high-grade kush o marijuana.
Dugang pa ni Celiz, si Remulla usa sa mga nagmaniobra sa pagdakop kang kanhi Pangulong Rodrigo Duterte, ug iyang gipangutana ang katakus ug kredibilidad sa bag-ong Ombudsman.
Matod pa niya, politikal ang motibo sa pagkatudlo ni Remulla, ug kini supak sa prinsipyo nga dapat ipatuman sa usa ka Ombudsman nga adunay pagkabutang, integridad, ug kabagtingan sa serbisyo publiko.
Gituohan usab sa Bangon Sambayanan nga ang unang buhaton ni Remulla mao ang pagpanalipod sa Pangulo Ferdinand “Bongbong” Marcos Jr. ug ni kanhing House Speaker Martin Romualdez, nga giingon niyang mga duol nga alyado ni Remulla.
Matod ni Celiz, ang maong pagtudlo usa ka dakong peligro sa kredibilidad ug katakos sa institusyon sa Ombudsman, nga unta mahimong independyente ug walay paboran sa pagpanalipod sa interes sa katawhang Pilipino.
Photo courtesy to: News- Inquirer.net
