Napulo ka mga Micro Small and Medium Enterprises (MSMEs) ang gikatakda nga mosalmot sa himoong Zamboanga Peninsula Exposition (ZAMPEX) 2025 nga pagahimoon sa Zamboanga City karong bulan sa Oktubre.
Matud ni Business Development Chief Elvis Dablo sa DTI Zamboanga del Sur, limitado lang sa napulo ka mga MSMEs ang gitugutan nga musalmot sa matag probinsya aron mapili ang saktong mga produkto nga andam na nga i-market.
Gisaysay pa sa opisyal sa DTI, ang mga MSMEs nga napili naggikan sa Pagadian Zamboanga del Sur Producers and Manufacturers Association Inc.( PZPMAI) nga andam ug kumpleto na sa lain-laing mga sertipikasyon gikan sa national government agencies.
Sa kinatibuk-an, mukabat sa 50 mga MSMEs ang nakatakdang mosalmot sa Regional Trade Fair gikan sa nagkadaiyang mga probinsya sa Zamboanga Peninsula ug gilaumang madugangan pa sa mga MSMEs nga naggikan sa SULU provinces sa umaabot.
