Nakatala ang usa ka lalaki sa Japan pinaagi sa pagdagan sa 100 metros gamit ang iyang kamot ug tiil (mikamang) sulod lang sa 14.55 segundos, hinungdan nga nalakip sa bag-ong Guinness World Record.
Si Ryusei Yonee, 22 anyos, mao na karon ang bag-ong record holder para sa “fastest 100 meters running on all fours”. Gipalabwan niya ang record ni American Collin McClure nga 15.66 segundos paadtong 2022.
Matod ni Yonee, nagsugod siya og praktis og dagan gamit ang kamot ug tiil sukad pa siya sa middle school.
“Giingnan mi sa among maestro nga ang mga hayop nga upat og tiil mas paspas modagan.
Mao to nakahunahuna ko: Pwede ko mahimong pinakapaspas nga tawo nga modagan gamit ang akong kamot ug tiil,” saysay niini sa Guinness World Records.
Nag-andam si Yonee para sa iyang record attempt pinaagi sa pagtan-aw sa lihok sa mga hayop nga upat ang tiil sama sa iro, iring, ug unggoy.
Giingon niya nga daghan siyag oras nga gigahin aron makuha niya ang iyang technique sa pagdagan sa track.“Kadaghanan sa akong training kay sa baybayon ko gibuhat (buhangin),” dugang pa niini.
Matod pa sa atleta, daghan pa siyag gustong world records nga makab-ot.“Mas maningkamot pa gyud ko og praktis kaysa sauna. Gusto nako buhaton ang tanan nakong makaya aron mapalambo ang “all-four sports,” dugang pa niya.
Photo Courtesy Guinness World Record
