Gilauman nga mopabilin sa USD2 bilyon hangtod USD3 bilyon ang kita sa export sa lubi sa Pilipinas hangtod 2026 tungod sa nagkadako nga panginahanglan ug mas lig-on nga suplay.
Matod ni Marco Reyes, chairman sa United Coconut Association of the Philippines, kusog ang panginahanglan sa kalibutan alang sa coconut products ilabi na sa health ug wellness. Niadtong 2024, nisaka sa record nga USD2.2 bilyon ang kita sa export sa lana sa lubi, diin 50% niini ang padulong sa Europe ug 20% sa US.
Gilauman usab ang mas maayo nga produksyon tungod sa mas ubos nga hulga sa bagyo, pagpalambo sa value-added products sa pribadong sektor, ug inisyatiba sa gobyerno sama sa replanting, hybridization ug fertilization.
Sa World Coconut Congress, giingon ni PCA Administrator Dexter Buted nga target sa gobyerno ang pagpangtanom og 100 milyon ka lubi hangtod 2028 aron mapalawom ang posisyon sa nasud sa global market. Niadtong 2024, 8.6 milyon ang natanom ug target karong tuiga 15.3 milyon, samtang sa sunod nga tulo ka tuig, mga 25.3 milyon matag tuig.
Gilauman sab nga adunay buffer nga 150 hangtod 160 milyon ka tanom batok sa hulga sa peste ug climate change. Ang programa gitagana og pondo nga PHP2.8 bilyon karong tuiga, layo sa mas gamay nga budget sa miaging mga tuig.
Photo courtesy to:Business Mirror
