Gi-aprubahan na sa House Committee on Appropriations sa Committee level ang gisugyot nga ₱6.793 trilyon nga national budget alang sa tuig 2026. Nahuman kini human sa 37 ka adlaw nga deliberasyon sa lebel sa komite.
Gi-dawat sa komite ang mga kausaban nga giduso sa sub-komite niadtong Lunes, diin ang ₱255 bilyon gikan sa orihinal nga alokasyon sa Department of Public Works and Highways (DPWH) alang sa mga flood control projects, gibalhin ngadto sa mga programa sa Edukasyon, Panglawas, ug Kaayohan sa Katilingban.
Matud pa ni House Appropriations panel Chair ug Nueva Ecija Rep. Mikaela Angela Suansing, karong tuiga, gipatuman ang lapad nga reporma sa proseso sa paghimo sa budget aron iduso ang transparency ug malikayan ang kontrobersyal nga “insertions” nga nahitabo niadtong milabayng tuig.
Ang gipangbalhin nga pondo gi-apod-apod sa mosunod nga mga ahensya: ₱26.5 bilyon nga dugang sa budget sa Department of Education (DepEd); ₱29.28 bilyon nga dugang sa budget sa Department of Health (DOH); ₱60 bilyon ang gigahin sa PhilHealth; ₱35.91 bilyon nga dugang sa Department of Social Welfare and Development (DSWD); ₱39.36 bilyon nga dugang sa Department of Agriculture (DA).
Matud ni Suansing, gipaabot nga ma-aprubahan sa ikaduhang pagbasa ang gisugyot nga budget sa dili pa matapos ang Setyembre, ug maabot ang ikatulo nga pagbasa sa pagbalik sa sesyon sa Nobyembre.
Photo courtesy: House of Representative
