Gibuksan na sa Pag-IBIG Fund ang aplikasyon sa Pag-IBIG Loyalty Card Plus alang sa mga miyembro nga aktibo sa kontribusyon sa miaging unom ka bulan. Ang card naghatag og discounts ug rewards sa kapin sa 480 ka partner establishments sama sa botika, ospital, eskwelahan, ug restaurants.
Sumala kang Jap Delmo, Manager III sa Public and Media Affairs Department, ang Plus card mao ang bag-ong bersyon sa orihinal nga loyalty card nga unang gilunsad niadtong 2014. Ang kalainan niini, mahimo na kini gamiton isip cash o debit card. Bisan tuod wala na gi-produce ang orihinal nga card, magamit gihapon kini kung wala pa kay Plus version.
Para makakuha sa card, kinahanglan moadto sa pinakaduol nga Pag-IBIG branch, mag fill up sa application form, magpakita og valid ID, ug magbayad og P125 nga one-time card fee sa AUB o UB, nga partner banks sa Pag-IBIG. Kinahanglan usab moagi sa biometric capture alang sa picture, fingerprint scan, ug signature. Human niini, ang card mahimo nang makuha sa samang adlaw.
Ang mga nawad-an o nadaot nga card mahimo usab mag-request og bag-ong card sa partner bank. Bisan dili kini opisyal nga ID, magamit gihapon ang Pag-IBIG Loyalty Card Plus sa ubang identification process.
SOURCE: ABS CBN NETWORK
