Gikumpirma sa Department of Information and Communications Technology (DICT) nga 19 ka mga website sa mga opisina sa gobyerno ang na-hack atol sa kilos-protesta niadtong nilabayg adlaw sa nagkalain-laing parte sa nasud.
Sa press briefing sa Malacañang, gipadayag ni DICT Secretary Henry Aguda nga giusab sa mga hacker ang hitsura ug logo sa pipila ka mga site, lakip na ang sa Department of Education (DepEd), Bureau of Customs (BOC), usa ka yunit sa Anti-Red Tape Authority (ARTA) ug ang mismong Department of Information and Communications Technology kon DICT.
Dugang pa niya, naibalik dayon ang kontrol sa maong mga website ug wala’y sensitibong impormasyon nga nakuha o gikawat. Gisiguro ni Aguda nga luwas ug kontrolado ang cyberspace human nilang mapugngan ang mas grabe nga cyber-attack pinaagi sa Oplan Cyberdome, nga gihimo sa gobyerno uban ang suporta sa mga telco companies, social media platforms, cyber community, ug pribadong sektor.
Giingon sa DICT nga ang 19 ka websites nga naapektuhan mao lang ang gamay nga bahin kumpara sa kapin 60,000 ka government websites ug apps sa tibuok nasud.
Photo courtesy: BusinessWorld
