Gibawal na sa Taliban ang paggamit sa mga libro nga gisulat sa kababayen-an sa mga pampublikong unibersidad sa Afghanistan, apil na usab ang pagtudlo sa mga kurso nga may kalabotan sa ‘karapatang pantao’ ug sexual harassment.
Base sa report, kapin 140 ka libro nga sinulat sa kababayen-an — lakip na ang “Safety in the Chemical Laboratory” — ang naapil sa 680 ka libro nga giisip sa Taliban nga supak sa ilang Sharia law ug polisiya sa nasud.
Gidugang pa nga adunay 18 ka kurso nga dili na itugot pagtudlo, diin unom niini adunay tuyo sa pagdiscuss sa kababayen-an sama sa Gender and Development, The Role of Women in Communication, ug Women’s Sociology.
Matod sa Taliban, ang maong mga kurso supak matud pa sa prinsipyo sa Sharia ug sa ilang sistema sa polisiya.
Kini usa lamang sa daghang pamaagi sa sunod-sunod nga pagpanghipos sa katungod sa kababayen-an sukad sa pagbawi sa Taliban sa gahum upat ka tuig ang milabay. Pipila ka adlaw ang milabay, gipagbawal usab nila ang paggamit sa fiber-optic internet sa dili moubos sa napulo ka lalawigan aron matud pa malikayan ang “immorality.”
Sa tuig 2024, gipasarado na nila ang mga kurso sa midwifery, ug hangtod karon, gibawal gihapon sa kababayen-an ang pag-eskwela lampas sa Grade 6.
Bisan pa sa pagdepensa sa Taliban nga ilang girespeto ang katungod sa kababayen-an sumala sa ilang interpretasyon sa kulturang Afghan ug Islamic law, nagpadayon gihapon ang kusog nga batikos gikan sa lokal ug internasyonal nga komunidad tungod sa klaro nga diskriminasyon ug pagpangwagtang sa katungod sa kababayen-an.
Photo courtesy: Human Rights Watch
