Andam na ang nagkadaiyang unit sa National Capital Region Police Office (NCRPO) alang sa gilauman nga dakong rally karong Domingo, Setyembre 21.
Sumala ni NCRPO chief Maj. Gen. Anthony Aberin, naporma na ang mga Civil Disturbance Management (CDM) Units nga ibutang sa dagkong kalsada diin ipahigayon ang demonstrasyon ug aksyon-protesta.
Gibutyag usab ni Aberin nga libo-an ka pulis ang ipadala nga andam motabang gikan sa traffic management hangtod sa kontrol sa mga ralyista, samtang nakahimo na usab sila og alternative security plan.
Sa kinatibuk-an, 2,200 ka miyembro sa CDM ang i-deploy, samtang 300 pulis ang magpabilin isip standby support force. Dugang pa, 40 ka pulis ang mahimong drone operators aron sa mas lapad ug epektibong pagbantay sa kahimtang sa rally. Samtang sa bahin sa border control, kapin 530 ka personahe sa NCRPO ang ibutang sa mga checkpoint sa Metro Manila, ug 436 ka pulis ang ipahiluna para sa traffic management.
Gisiguro usab ni Aberin nga ang tanang pulis giinstruksyonan sa pagpatuman sa maximum tolerance, apan iyang giklaro nga dili lang tan-awon sa kapulisan kon adunay mga molapas sa balaod atol sa protesta.
Photo courtesy: Philstar.com
