Gipahibalo si Department of Public Works and Highways (DPWH) Secretary Vince Dizon nga gikatakda siyang makigtagbo sa Anti-Money Laundering Council (AMLC) aron tukion ang posibleng pagsakmit sa mga kabtangan sa mga nalambigit sa Flood Control.
Matod ni Dizon, dili igo nga prisohon lang ang mga responsable, apan kinahanglan usab nga iuli sa katawhan ang kuwarta nga gikawat sa panudlanan sa katawhan. Ang maong lakang mahimong ipahamtang sa tanang indibidwal nga napasakaan na o mapasakaan og kaso sa Office of the Ombudsman.
Samtang, gipasalig ni Dizon nga andam silang motabang sa gitukod nga Independent Commission for Infrastructure. Ang kalihim niingon nga nakuha na nila ang tanang mga dokumento nga gikinahanglan sa komisyon sa pag-imbestigar sa mga proyektong imprastraktura nga gitukod sa departamento sa miaging 10 ka tuig.
Sa pagkakaron, samtang wala pa magsugod ang independent commission, padayon gihapon ang ahensya sa pagpanubag sa mga nalambigit. Matod ni Dizon nga di sila mohunong sa pagpasaka og kaso sa Office of the Ombudsman.
Gidugang sa kalihim nga gikatakdang ipasaka sa departamento ang ikaduhang batch sa mga kasong kriminal batok sa mga opisyal ug mga kontraktor nga giingong nalambigit sa mga iregularidad sa mga flood control projects sa Oriental Mindoro sunod Miyerkules.
Kahinumduman nga niadtong Huwebes, Septiyembre 11, gipasakaan og kaso ni Dizon ang 25 ka mga tawo kalabot sa mga anomalosong proyekto sa Bulacan.
Photo courtesy:ASSISTANCE.PH
