Naka red alert status ang Armed Force of the Philippines (AFP) tungod sa nagpadayong mga lihok protesta sa nagkalain-laing dapit sa Metro Manila tungod sa giingong mga palpak ug korapsyon sa mga proyekto sa Flood control.
Gikumpirma ni AFP Spokesperson Col. Francel Margareth Padilla nga ang tanang yunit sa Armed Forces anaa na sa red alert status sukad niadtong Septiyembre 12.
Kini isip pagpangandam sa ilang tropa nga mosuporta sa Philippine National Police (PNP) sa pagmintinar sa seguridad atol sa mga kalihokan sa mga progresibong grupo sa umaabot nga mga adlaw.
Bisan og kining maong lakang kabahin usab sa ilang standard security measures kon mograbe pa ang sitwasyon, gipasalig ni Padilla nga dili angay mabalaka ang publiko sa sitwasyon karon sa mga nahitabong rally.
Gipasabot pa ni Padilla nga ubos niini, adunay igong gidaghanon sa mga personahe ang AFP nga idestino isip standby forces alang sa podibleng dili maayong mga panghitabo.
Samtang, gipasalig usab ni Padilla nga kining lakang sa Armed Forces mao ang pagsiguro nga mapabilin ang kahapsay ug kalinaw taliwala sa nahitabong mga protesta.
Photo courtesy:ABS-CBN
