Napakyas na usab ang mga bangko sa Pilipinas sa pagkab-ot sa gimando nga lending quota alang sa micro, small and medium enterprises (MSMEs).
Ang datos gikan sa Bangko Sentral ng Pilipinas (BSP) nagpakita nga ang mga pautang sa bangko nga gihatag sa mga MSME misaka og 10.8% ngadto sa P540.92 bilyon pagka-katapusan sa Hunyo gikan sa P488.13 bilyon sa miaging tuig.
Apan, katumbas lang kini sa 4.59% sa ilang kinatibuk-ang loan portfolio nga P11.78 trilyon.
Kini ubos sa 10% nga kinatibuk-ang kinahanglanon alang sa mga bangko ilalom sa Magna Carta for MSMEs. Ilalom sa balaod, ang mga bangko kinahanglang magpagahin og 8% sa ilang loan portfolio alang sa mga micro ug gagmay nga negosyo, ug 2% sa mga medium-sized nga negosyo.
Subay sa balaod ang usa ka microenterprise isip usa ka negosyo nga adunay kinatibuk-ang assets nga dili molapas sa P3 milyon, samtang ang assets sa usa ka gamay nga negosyo gikan sa labaw sa P3 milyon ngadto sa P15 milyon, ug ang assets sa usa ka medium-sized enterprise mahimong labaw sa P15 milyon hangtod sa P100 milyon.
Base sa datos sa BSP, ang mga pautang sa mga micro ug gagmay nga negosyo mikabat og P220.55 bilyon katapusan sa Hunyo. Kini mikabat lang sa 1.87% sa ilang kinatibuk-ang loan book, layo sa 8% nga quota.
Ang mga bangko nagpagawas og P320.37 bilyon nga pautang sa mga medium nga negosyo, nga mikabat sa 2.72% sa ilang kinatibuk-ang portfolio, nga milapas sa 2% nga quota.
Kadaghanan sa mga bangko mipili nga bayran ang mga penalty alang sa pagka-dili compliant sa MSME lending quota, imbes nga magkuha og mga risgo nga kauban sa pagpahulam sa gagmay nga mga negosyo.
