Gideklara na nga santo si Carlo Acutis, 15-anyos nga Italianong ulitawo nga nailhan nga “God’s influencer”, atol sa canonization mass nga gipangunahan ni Pope Leo XIV, kagahapon adlawa Domingo, Setyembre 7, 2025, sa St. Peter’s Square, Vatican City.
Namatay si Carlo niadtong 2006 tungod sa leukemia, apan nabantog sa iyang lawom nga pagtuo ug paggamit sa teknolohiya, aron palapdan ang debosyon sa Eukaristiya.
Nakahimo siya og website nga nagdokumento sa kapin 100 ka milagro. Gipasidunggan siya sa simbahan human ma-ila ang duha ka milagro nga nalambigit kaniya: ang milagrosong pagkaayo sa usa ka batang Brazilian, nga adunay rare pancreatic disorder ug ang pagkaayo sa estudyanteng taga-Costa Rica, nga nag-antos og grabe nga head injury human giampoan sa binatilyo.
Giingon sa inahan niini, nga si Carlo usa ka normal nga bata nga mahilig sa video games ug soccer, apan adunay dakong kasingkasing para sa Diyos.
Gitipigan karon ang iyang lawas sa Assisi, Italy, diin siya gilubong nga nagsul-ob lang sa kasagarang sinina jeans, sneakers, ug hoodie.
Ang canonization ni Carlo giila nga timaan sa simbahan sa makabag-ong pamaagi sa kabanalan, ilabina alang sa kabatan-onan sa panahon karon.
Photo courtesy to: little flower parish
