Gikatakdang magsugod sa pag-apod-apod sa bugas nga nagbalor og Php 20 matag kilo ang Department of Agriculture kon (DA) ngadto sa mga jeepney ug tricycle drivers sunod buwan. Ang inisyatiba nagtumong sa paghatag ug hinabang sa nahisgutang mga sektor pinaagi sa pagpakunhod sa ilang gasto sa pagkaon, ilabina sa bugas.
Sa dili pa ang full-scale nga implementasyon sunod buwan, ang DA adunay pasiunang roll out sa Php 20 rice program para sa mga jeepney ug tricycle drivers.
Gitakda kini sa Septiyembre 16 ug ipahigayon sa lima ka pilot areas aron sulayan ang sistema ug mailhan ang bisan unsang posibleng problema sa dili pa mahitabo ang mass distribution.
Matod ni Agriculture Secretary Francisco Tiu Laurel Jr., aktibo na nga nakig-alayon ang DA sa Department of Transportation (DOTr) kalabot sa pagpatuman sa maong programa. Ang DOTr maoy naghupot sa database sa TODAs (Tricycle Operators and Drivers’ Associations), nga gikinahanglan sa pag-ila ug pag-verify sa mga benepisyaryo sa programa.
Usa sa mga pilot area nga napili alang sa pasiunang roll out mao ang Navotas City. Kini nga siyudad adunay listahan sa gibana-bana nga 4,000 ka mga accredited nga jeepney ug tricycle drivers, kinsa maoy unang makabenepisyo sa maong programa.
Ang Navotas usa sa mga lugar nga gikonsiderar gumikan sa kadaghan sa mga drayber ug ang organisado nga TODA system niini. Ang DA nagkanayon nga ang Php 20 rice program unang gilusad alang sa ubang sektor sa katilingban, sama sa solo parents, senior citizens, 4Ps beneficiaries, ug persons with disabilities.
Gumikan niini nagpakita og pasalig ang gobyerno sa pagsuporta sa nagkalain-laing huyang nga sector pinaagi sa maong programa.
Photo courtesy to: wordpress.com
